كمان مرة خروف العيد

 اصدر الخرفان العديد من البيانات ومنها بيان ائتلاف (خرفان من أجل الحياة) وجاء البيان كالتالي:

 قرر السيد / ضانى أبو ليه المنسق العام لائتلاف (خرفان من أجل الحياة) والعضو المؤسس لتحالف (مش عشان أنا بلية .. تكلونى بالطريقة دية)، عمل مليونية فى ميدان صوفى بالتنسيق مع ائتلافات (القرن الديمقراطى)، (وخرفان إلى الأبد)، وحزب (نحو مدبح مدنى)، للتنديد بالمجزرة المزمع عملها أول وثانى وثالث أيام العيد، على أن يقوم ائتلاف (عاملنى بالمعروف.. ولا عشان أنا خروف) بالإجراءات الأمنية وحماية الميدان من أى جاموس أو بقر "مندس".

حملة الخرفان بعنوان "خليك نباتي وأنقذ حياتي" تدعو وتستعطف الشعب المصري لخروج الخرفان سالمين في هذا العيد. 

كل سنة وأنتم طيبين.. وعيد أضحي مبارك بدون "مبارك".

العيد، وكمان مرة العيد، يعنى: الكندوز والضانى، يعنى: اللحمة "هبر" فى صوانى، يعنى: الكبدة بعون الله إسكندرانى، وسمعنى أحلى سلام "بودعك" لخروف العيد. 

خروف فرفور قبل مايدبح سألوه تتمنى إيه بعد ما نذبحك؟ قال تاكلونى بالراحة. 

واحد جه يدبح الخروف فلقى الخروف ميت من الضحك، قال له بتضحك على إيه؟ قال أصلك ماسك السكينة مقلوبة.